© 2001 Patricia Jane St. John Danko


Mil grazas a Vicente Araguas pola súa tradución deste poema ao idioma galego.

Para un galego

          PARA UN GALEGO

 

           Sangue negro escurece desde o halo da lúa

           caldeiros ferven e bruxas choran

           guinchando brillos das estrelas

                     fillas nadas de Lilith,

                     feitas para alentar sen alma

                               mais con

                               tremente

                               corazón xeado.

 

   Portas abertas do Sidh

                                   en Galicia.

 

           Milladoiros treman e labirintos axitan as pedras

           secretos rúnicos fenden o ceo

             vermellos de carraxe con cruces célticas

                     debuxadas por druidas tempo morto

                     e podre antes de que o santo Nazareno,

                               o carpinteiro,

                               fose crucificado

                               na Súa Cruz.

 

           Solpor do Samaín

                                   en Galicia.

 

           En chimpos ardentes través do purgatorio

           anxos amortallados gardan os corazóns

           chaman para abaixo ás estrelas máis fugaces

                     preiteando coa noite impedida

                     mentres os cans lobos ouvean e ladran

                              para arrincar

                              o mercurio

                              da lúa.

 

           Lume do solsticio de San Xoán

                                   en Galicia.

       

 

 

           Aleluias demoníacos pairan

           procurando pomposos minuetos de sombra

           a seiva máis pura do inferno, unha danza

                     mentres os defensores da chama do Sabbat confían

                     en que Eros, tan farto, aínda quentando

                              mudase nunha calor

                              de queimada,

                              gastada, refulxente.

 

           Noite escura da alma

                                    en Galicia.

 

           Entón a tea de araña en brazos á espreita

           a aperta encapotada de Galicia

                                   derretendo visións, amañando cicatrices

                     sen medo da fulixe e da pedra

                     sen mulleres de nomes extraños

                     sen escuro de esencia

                             sen queixumes pantasmais

                             que boien.

 

          Nobreza primordial

                                    en Galicia.

 

          Esquecidos cabelos da caluga érguense para volver transmitir

          un medo delicioso, retornado

                          de tobogáns e norias

                     xeitosas metamorfoses

                     a trasnos entoando cánticos

                             homes lobos ouveando

                             vampiros

                             de asa negra.

 

           Nenez nova e sen alento

                        en Galicia.

 

          

 

 

           Eternidade e perpetuidade

           berrando vento e mar que guincha

           augalume acesa e domada

                      amencer en días novos de zafiro

                      onde os sensos tiránicos que latexan mandan

                              cangada

                              inocencia

                              á que culpar.

 

            A arca da paixón bautizada

                                   en Galicia.

 

 Co calafrío e a humidade dunha catacumba

           fría como a mamila dunha bruxa

           a vistante acreditaba na dor

                     e a dor infurable viña furada

                     pola tenrura destemida

                             e a forza do desexo

                             para amar.

 

           Vida ardente o galano

                  de Galicia.

 

 


     

© 2001 Patricia Jane St. John Danko
.

Please , feel free to e-mail me  your comments and questions !!
If you prefer, please complete and submit this form .


Diseñada Para
800 x 600